Интернет алаяқтықтың құрбаны болмау үшін құқықтық сауаттылығыңды арттыр
Қызылорда облысы Полиция департаментінің Жергілікті полиция қызметі басқармасы қызметкерлері колледж студенттерімен кездесу өткізді. Шараның негізгі мақсаты — елімізде киберқылмыстардың көбеюіне байланысты олармен күресу жолдарын түсіндіру және кәмелетке толмаған жасөспірімдердің киберқылмыстан сақтану деңгейін арттыру.
Кездесу барысында Киберқылмысқа қарсы іс-қимыл басқармасының жедел уәкілі, полиция аға лейтенанты С. Сейтқасымов және ювеналды полиция полковнигі Ғ. Нәғметов сөз сөйледі. Олар кибер алаяқтықтың кең таралған түрлері туралы айтты. Атап айтқанда, банк қызметкері атынан телефон соғып, азаматтардың шоттарынан ақша ұрлау, сондай-ақ OLX секілді интернет-платформаларда бар емес тауар немесе қызмет үшін алдын ала төлем немесе толық соманы сұрау арқылы жасалатын алаяқтық әрекеттерден сақтануға шақырды.
— Қылмыстың алдын алу — ең тиімді жол. Ол үшін әрбір азамат құқықтық сауатты болуы тиіс. Біз осындай кездесулер арқылы қылмыстың алдын алуға күш саламыз, — деді полиция өкілдері.
